صحاب و لكن

 

الصداقة.. ما مفهوم الصداقة المفروض؟!

الصداقة دي المفروض هي من اهم العلاقات بين الناس وخصوصا البنات، كانوا بيقولوا زمان دول بقوا شبه بعض من كتر ما هم صحاب، دول بهتوا على بعض، بيتكلموا زي بعض، بيلبسوا زي بعض، بيتصرفوا زي بعض، كانوا بيقولوا مينفعش تعرف فلانة من غير ما تعرف علانة دول لازم تاخدهم على بعض كدا على بعض، كانوا بيقولوا لاي واحد لو عايز تحب فلانة لازم صحبتها تبقى بتحبك عشان موضوعك يمشي، أصلها لو محبتكش إنسي بقي، بس!!

يا ترى بقى في ايه بين الصحاب و بين بعض في ايه في النفوس في ايه كل واحد شايله جواه مين الطرف الي بيدي و مين الطرف الي دايما بياخد، مين بيعافر عشان يتبت في الحبل الي ماسك العلاقة دي و مين الي دايما بيسيب، مين الي دايما بيقرب ، مين الي مصر يبعد، مين الي واخد العلاقة وقت فراغ، و مين الي علاقته بصحابه اولويات، دايما في طرف بيعافر و طرف هادي اوي، طرف بيحاول و طرف مسطح العلاقة و بعد فترة الطرف الي حاول دا خلاص نفسه بيتقطع، بيتعب من المعافرة، بيتعب من شد الحبل، بيتعب من المجاهدة، فبيقرر يسكت هو كمان و يهدى هو كمان فبنوصل لحل من اتنين، يا الطرف الي كان دايما بيتلقى بيبتدي يحاول يعافر و يحاول هو كمان يشد الحبل و مجهوده دايما بيكون مضاعف و يا عرف يا معرفش و لما مبيعرفش بيبقى هو صاحب الحق، اصل هو الي عافر، هو الي اعتذر بس ساعات كتير وقت الاعتذار مبيفدش بحاجة، ساعات خلاص مش بنبقى قادرين نقبل اعتذارو ساعات الطرف الثاني دا مبيخدش باله ان العلاقة بتنتهي فبيسكت و مبيعملش اي مجهود لحد ما العلاقة بتنتهي... ايوة بتنتهي بعد ٢٠، ٣٠ سنة اه بتنتهي بيبقي و لا كأن كان!

كتير اوي بنسمع عن واحدة بتيجي مثلا تتجوز بين صحابها البنات فتخبي.. بتخبي ليه؟ بتخبي عشان ميحسدوهاش! اه والله ميحسدوهاش.. صحابها عشرة عمرها فجأة قررت تبعد عنهم عشان خايفة منهم أحسن يحسدوها، أصلهم مش متجوزين وهي هتتجوز، طيب لو كانوا متجوزين كنتي هتحكيلهم وتعرفيهم حاجات عنك؟ طب لو كان نصيبهم جه هم الاول كنتي تحبي يخبوا عليكي برده؟ طيب لما هتبعدي عنهم هتعملي ايه؟ هتحمي لمين؟ هتفضفضي لمين؟ هتروحي بقي تتعرفي على ناس جديدة متجوزة عشان تبقوا كلكوا زي بعض فبيحصل ايه؟ بتخبي وتبعد وتنفرد بحياتها وفجأة بتخلص دوشة الجواز والفرح والكلام دا كله وفجأة بتلاقي نفسها لوحدها! أصل الصحاب الجداد جايين يفرحولهم يومين ويضحكوا ويتصوروا كام صورة والصحاب القدام موجوعين اوي! بتيجي ترجع تاني للاسف بيكون صعب اوي ومبتعرفش ترجعهم جمبها تاني، أصلها جرحتهم اوي! هو فيه جرح بين الصحاب؟ اه في! بمعني اصح اقوى جرح هو الجرح الي بين الصحاب.

موقف تاني.. واحدة كانت فرحانة اوي بحاجة وراحت تحكيها لواحدة صاحبتها عندها مشكلة في حياتها منفعلتش معاها زي ما هي متعودة منها او زي ما هي متوقعة منها! فزعلت منها وقالتلها في ايه انتي مش فرحنالي ولا ايه فصاحبتها قالتلها معلش أصل انا عندي مشكلة، قالتلها لا انا الي معلش انتي مش عارفة تفرحيلي وقفلت معاها كلمت واحدة صاحبتها تانية قالتلها شوفتي فلانة عملت ايه شوفتي بقولها ايه ورديت ازاي تروح صاحبتها تقولها لا دي وحشة اوي خلاص متكلميهاش تاني وفعلا متكلمهاش تاني! الموقف اصلا ان صاحبتكوا الاولى دي بتمر بمشكلة صعبة وانتوا مش عارفين انها بتمر بشئ صعب، بس النتيجة انها للاسف بتمر بالوقت دا لوحدها وبتقف في مشكلتها لوحدها مش بتزعل منكوا انكوا مقدرتوش، و يمكن لو كنتوا عرفتوا انها بتمر بوقت صعب انتوا كمان مكنتوش زعلتوا منها، و حقكوا متسمحوش لحد انه ينكد عليكوا في اوقات افراحكوا، و طبيعي ان مش مطلوب منكوا تستنتجوا و تحللوا تصرفات الناس الي قدامكوا، طبيعي بتاخدوا بالظاهر، بس خلاص الوقت للاسف بيكون عدى وهي بتتعود تقضي مواقفها لوحدها، و انتوا اتعودتوا على انها تبعد و متردش و تبرد العلاقة، وبتخرجوا مجروحين اوي من بعض، هو فيه جرح بين الصحاب؟ اه في! بمعني اصح اقوى جرح هو الجرح الي بين الصحاب.

موقف تالت اتنين صحاب واحدة زعلت من واحدة ومقلتلهاش وهم صحاب اوي اوي وعشرة عمر وفضلت مخبية وساكتة كتير اوي اوي وفجأة مبقتش تعرف تتكلم معاها والعلاقة بدأت تتسطح والتانية مش فاهمة.. لا دي قالت ولا دي فهمت وبعدوا والعلاقة اتسطحت واتجرحوا هم الاتنين، هو فيه جرح بين الصحاب؟ اه في! بمعني اصح اقوى جرح هو الجرح الي بين الصحاب.

موقف رابع بنتين متربيين مع بعض واحدة دايما وقفة جنب صاحبتها وواقفة في ظهرها والتانية ضامنة دا ومعتبراه حق ليها ودايما مفيش مقابل، دايما بتاخد من صاحبتها ومفكرتش مرة تدي، مش كره بس يمكن ضامنة وجودها، يمكن مبتعرفش تدي، يمكن يمكن يمكن... وبعد فترة الطرف الي دايما بيدي الي دايما بيجي على نفسه دا تعب فبقي فيه فتور في العلاقة فصاحبتها سألتها قالتلها مالك انتي متغيرة معايا ليه؟ قالتلها بعاملك بإسلوبك مش قادرة اديكي حاجة تاني مش قادرة اجي على نفسي تاني مش قادرة اتعامل معاكي على ان كل حاجة بعملهالك وبقدمهالك هي حق مكتسب ليكي، مش عارفة اعيش من غير تقدير اكتر من كدا، والعلاقة اتسطحت عشان لا دي قدرت تسامح ولا دي عرفت تتنازل واتجرحوا هم الاتنين، هو فيه جرح بين الصحاب؟ اه في! بمعني اصح اقوى جرح هو الجرح الي بين الصحاب.

موقف خامس كان دايما في واحدة في وسط صحابها هي الي بتكلمهم، هي الي بتجمعهم، هي الي بتسأل، هي الي بتسمع، هي الي بتستحمل، هي الي بتيجي على نفسها، بس للاسف الباقي محسوش، مفهموش ومقدروش، مفهموش اصلا انها بتيجي على نفسها، في يوم قررت غصب عنها تبعد والي حصل ان محدش سأل، محدش اهتم، محدش سمع، محدش جمع حد، كل واحد انشغل بحياتوا، كلهم زعلوا اوي منها عشان مبقتش تسأل عليهم زي الاول، مبقتش تجمعهم زي الاول، هي مقدرتش تسامح، كلهم بعدوا عن بعض واتجرحوا، هو فيه جرح بين الصحاب؟ اه في! بمعني اصح اقوى جرح هو الجرح الي بين الصحاب

الوجع بين الصحاب موجود، الجرح في العلاقات بين الصحاب موجود، وعلى اد القرب على اد عمق الوجع، على اد الحب على اد الزعل، على اد العشم على اد قدرتنا على التسامح، غصب عننا مبنعرفش نسامح ناس زعلنا منهم عشان كنا مستنين منهم يقدرونا، مبنعرفش نسانح ناس زعلنا منهم عشان اتعشمنا فيهم وخذلونا ومبنعرفش نسامح ناس احتاجنالهم وملقيناهمش، غصب عننا بنحاول نسامح بس مبنعرفش!

ساعات بنبقى عارفين ان صحابنا بيحبونا اوي، ساعات بنبقى عارفين انهم مش قصدهم يضايقونا، ساعات بنبقى عارفين ان نيتهم تجاهنا خير، ساعات بنبقى عارفين انهم مبيسألوش علينا عشان بس هما متعودين اننا الى بنزعل، ساعات مبيكلموناش عشان متعودين اننا احنا الي بنتكلم، ساعات مبيهتموش بزعلنا عشان عارفين اننا مبنزعلش، ساعات مبيهتموش مش اهمال بس ضمان، ضمان وجودنا، ضمان حبنا ليهم، ضمان بقاءنا، و بيجي علينا فترة بنتعب، بنبقى فاهمين و عارفين و مقدرين بس نفسنا نحس اننا مهمين، نفسنا نحس ان وجودنا بيفرق، و ان عدم وجودنا بيزعل، فبنزعل لما مبنلاقيش دا، و ساعات لما بنزعل و مبنعرفش نرجع تاني زي الاول و العلاقة بتتسطح !

لازم يكون لينا كلنا خصوصيتنا ومن حقنا نحافظ على خصوصيتنا ومن حقنا نحافظ ان مفيش حد يقتحم خصوصيتنا ومن حقنا يكون لينا وقتنا الخاص بينا ومن حقنا نمنع اي اقتحام للوقت دا، بس من غير ما نجرح صحابنا من غير ما نخليهم بيعدوا او نتسبب انهم يبعدوا!

قدروا اوي علاقات الصداقة، الاصدقاء يعني عشرة، يعني مدرسة، وجامعة وخروج، يعني جيرة وصحبة، يغني مواقف حلوة ومواقف صعبة، يعني الضحك والعياط، يعني قعدات من القلب للقلب، يعني أحلى سنين حياتنا، يعني فضفضة واسرار، يعني ذكريات!

قدروا وجود اصدقائكوا في حياتكوا، حافظوا على العلاقة دي اوي، احموها من الضياع، وتبتوا في الحبل، ورمموه لو حسيتوا انه بدأ يدوب، اعملوا عشان سنين العمر الي بينكوا تزيد، متهمشوش وجود اصدقائكوا في حياتكوا عشان اتعودتوا على وجودهمو دايما ارووا شجرة صداقتكوا بالحب والاهتمام والتقدير عشان الصداقة تدوم اكتر واكتر، وخلوا بالكوا ان في ناس على اد وجودها وقربها على اد اختفاءها وبعدها، قدروا اوي قدروا عشان متندموش وتتوجعوا الوجع بين الصحاب مبيتنسيش!

جربي كدا تجيبي هدية لصاحبتك الي بتحبيها وروحي اديهالها وقوللها إنك بتحبيها، جربي تجيبي هدية لصاحبتك الي انت حاسة إنك مقصرة في حقها، جربي تجيبي هدية لصاحبتك الي مقصرة في حقك وقوللها تخلي بالها انها مقصرة وإنك بتشدي في الحبل عشان باقية عليها، جربي تجيبي هدية لصاحبتك الي انتي زعلانة منها وتقوللها إنك كنتي زعلانة منها بس انتي بتحبيها ومش عايزة تخسريها وزعلانة ليه وتتصالحوا، متخسروش بعض اوعوا تخسروا بعض.

قومي يلا دلوقتي انتي وهي كلمي صحابك، انزلوا اتغدوا في مكان حلو، انزلوا اشربوا حاجة، انزلوا اتمشوا، اتجمعوا قرروا تتجمعوا زي زمان وتضحكوا بس وتفتكروا كل الذكريات الي بنكوا، طلعوا صوركوا القديمة وشوفوا اد ايه شكلكوا كان جميل ومازال جميل، شوفوا فات عليكوا اد ايه سنين وانتوا صحاب واعتذروا لبعضو هادوا بعضو حبوا بعض اوي... دا صحاب العمر مبيتعوضوش!

رجوع

قوللنا رأيك فيها أو التغيير اللى تحبى تعمليه

ضيفى تعليق على المقال

التعليقات (0)