كنافة بالتمر و الكريمة المخصوصة سخنة

ضيفي وصفتك

المقادير

  • نص كيلو كنافة مجمدة
  • معالق كبيرة سمنة
  • ربع كوباية زيت عباد شمس
  • 250 جرام تمر بدون بذر و مقطع صغير
  • نص معلقة صغيرة بيكاربونات
  • 2 صفار بيضة
  • 350 ملل لبن
  • 150 ملل كريمة طبخ
  • 100 جرام سكر
  • معلقة صغيرة فانيليا سايلة أو باكو فانيليا
  • 50 جرام دقيق
  • كوبايتين شربات بارد وصفة أبلة طازة

http://ablatazza.com/recipe/show/الشربات-المظبوط

طريقة العمل

أول حاجة تعملي الكريمة عشان تبرد, إخلطي اللبن على الكريمة و حطي في حلة على النار اللبن بالكريمة بس شيلي نص كوباية على جنب و عليهم الفانيليا و أول ما اللبن يسخن إطفي عليه و إضربي صفار البيض مع السكر كويس أوي و بعدين حطي نص كوباية اللبن و بعدين الدقيق و حطي الخليط دا على اللبن بالكريمة و رجعيه على نار هادية تاني و قلبي بإستمرار لحد ما الكرمية تبقى زي الباشاميل أطفي عليها و سيبيها تبرد

هاتي التمر و حطيه مع 100 ملل مياة و البيكاربونات و سيبيه يغلي علي نار هادية لحد ما يطرى و يكرمل. هاتي الكنافة و قطعيها صغير أوي و دا سهل جدا بإيديك لو الكنافة مجمدة بتتفرك و شوحيها على النار في الزيت و السمنة لحد ما لونها يبقي أصفر

إخلطي التمر بالكريمة و هاتي صينية 28 سم و حطي راقة كنافة و إضغطيها كويس و بعدين حطي الكريمة و حطي راقة تانية من الكنافة و دخليها فرن سخن جدا 240 درجة و لما الجوانب لونها يبقى دهبي غامق ولعي الشواية لحد ما كل الكنافة تاخد لون و بعدين طلعيها و هي سخنة و حطي عليها الشربات و تتاكل فورا

أبلة طازة بتقولك لما تحبي تسخنيها تاني يوم حطيها في الفرن و بعدين حطي عليها كام معلقة شربات هتبقى كأنها لسة معمولة طازة و لو حبيتي تحطي مع الكريمة عين جمل محمص ممكن جدا بس الريجيم هيضرب

ضيفى تعليق على الوصفة

التعليقات (0)